Кош бойлуулуктагы гестациялык диабет эч кандай белгилерсиз өтүшү мүмкүн – эндокринолог

Кош бойлуулук учурунда пайда болгон гестациялык кант диабети дээрлик эч кандай белгилерсиз өтүшү мүмкүн. Бул тууралуу дарыгер-эндокринолог Полина Лучкина «Биринчи радио» эфириндеги «Радиоклиника» программасында билдирди.

Анын айтымында, кош бойлуу аялдар кандагы канттын деңгээлин биринчи триместрде, тагыраагы, кош бойлуулуктун 6–8-жумасында эле текшертип турушу керек.

Кайрадан текшерүү кош бойлуулуктун 24–28-жумаларында жүргүзүлөт. Бул учурда ач карынга кан тапшыруудан тышкары, глюкозага толеранттуулук тести да жасалат.

Лучкина белгилегендей, көйгөйлөрдүн бири – кош бойлуу аялдардын медициналык каттоого кеч турушу. Айрым аялдар дарыгерге кош бойлуулуктун 12–13-жумасында же андан да кеч кайрылышат. Натыйжада алгачкы белгилер байкалбай калышы мүмкүн.

Гестациялык диабет аныкталганда, биринчи кезекте тамактанууну жөнгө салуу жана кандагы канттын деңгээлин үзгүлтүксүз көзөмөлдөө сунушталат.

Эгер бул жетишсиз болсо, дарыгер инсулин менен дарылоону дайындашы мүмкүн. Эндокринологдун айтымында, гестациялык диабетте инсулин терапиясы убактылуу болуп, төрөттөн кийин токтотулат.

Лучкина кош бойлуулук учурунда кандагы глюкозанын деңгээлин көзөмөлдөбөө эне менен баланын ден соолугу үчүн ар кандай татаалдашуулардын коркунучун жогорулатарын белгиледи.