Кыргызстандын Курулуш министрлигинин чыгымдарын үч эседен ашык көбөйтүү сунушталды

Кыргызстандын Курулуш, архитектура жана турак жай-коммуналдык чарба министрлигинин 2026-жылга карата чыгымдарын алгач бекитилген 393,2 млн сомдон 1 млрд 272,2 млн сомго чейин көбөйтүү сунушталууда. Ошентип, ведомствонун каржылоосу 879 млн сомго же үч эседен ашык көбөйүшү мүмкүн.

Мындай көрсөткүчтөр Министрлер кабинети Жогорку Кеңештин кароосуна киргизген 2026-жылга карата республикалык бюджеттин такталган долбоорунда каралган.

Финансы министрлигинин түшүндүрмө катындагы маалыматка ылайык, бюджеттик каражаттардын эсебинен каржылоо 107,9 млн сомго көбөйүп, 268,8 млн сомду түзөт.

Ал эми чыгымдардын негизги өсүшү атайын эсептерге туура келет. Аларды 771,1 млн сомго көбөйтүп, 1 млрд 3,4 млн сомго жеткирүү сунушталууда.

Анын ичинен 625,1 млн сом Мамлекеттик архитектура-курулуш көзөмөл департаментинин пландалган көрсөткүчтөрүнүн көбөйүшүнө байланыштуу. Дагы 137,2 млн сом департаменттин жыл башындагы калдыгы болуп саналат.

Мындан тышкары, министрликтин өнүктүрүү жана кызматкерлерин шыктандыруу фондуна 102,6 млн сом каралган.

Ошондой эле «Мамлекеттик архитектура-курулуш көзөмөлү» автоматташтырылган маалыматтык системасын жаңылоого 5,8 млн сом бөлүү пландалууда.

Мындан сырткары, документте мамлекеттик инвестициялар үчүн 2 млрд 26 млн сом каралган.

Жалпысынан министрликтин каржылоосунун олуттуу көбөйүшү республикалык бюджеттен түз бөлүнүүчү каражаттарга эмес, негизинен атайын эсептердеги каражаттардын өсүшүнө байланыштуу.

Сунушталып жаткан өзгөртүүлөр азырынча бекитиле элек. Алар Жогорку Кеңештин кароосунан өтүшү керек.