Чүй облусунда каракчылыкка шектелген адамдардын тобу кармалды

Москов РИИБне инкассатор болуп иштеген А.К. атту жаран арызы менен кайрылып, ал арызында, белгисиз азия улутундагы адамдарга чара көрүүнү суранган. Анын айтымында, 2025-жылдын 18-октябрында болжол менен саат 04:30 чамасында Москов районунун Петровка айылынын Ак-Суу бурулушунда, газ заправкасынын артында, беткап кийген белгисиз адамдар анын бетине калемпир газын чачып, эки сумкасын тартып алып, белгисиз тарапка качып кеткен.

Бул факты катталып, Кыргыз Республикасынын Кылмыш-жаза кодексинин 207-беренесинин (Каракчылык) белгилери боюнча кылмыш иши козголгон.

Ички иштер органдары жүргүзгөн ыкчам-иликтөө иш-чараларынын жыйынтыгында бул кылмышка шектелген адамдар аныкталып. Алар: 1988-жылы туулган С.Т., 1987-жылы туулган И.Н., 2000-жылы туулган У.М., 2002-жылы туулган Д.Ш. атту шектүүлөр Кыргыз Республикасынын КЖПКнин 96-беренесинин тартибине ылайык кармалып, убактылуу кармоочу жайга киргизилген. Райондук сот алардын ар бири боюнча камакка алуу түрүндөгү бөгөт чарасын тандаган.

Учурда кылмыш иши боюнча тергөө иштери улантылууда.