2025-жылдын эң таасирдүү саясатчылары аталды

Politico басылмасы 2025-жылы Европадагы саясий абалга олуттуу таасир эткен 28 эң таасирдүү саясатчынын жыл сайын түзүлүүчү рейтингин жарыялады.

Биринчилер катарынан АКШ президенти Дональд Трамп орун алды. Анын Ак үйгө кайтып келиши Европага чоң таасир тийгизди: континенттеги өлкөлөр анын коргонуу, соода жана тышкы саясаттагы туруктуу эмес саясатына ыңгайлашууга аргасыз болууда.

Экинчи орунга Даниянын премьер-министри Метте Фредериксен чыкты — ал катуу миграциялык саясаты жана Европанын коргонуу боюнча көз карандысыздыгын бекемдөөдө көрсөтүлгөн принципиалдуулугу менен белгиленген. Үчүнчү орунда — Германиянын канцлери Фридрих Мерц, ал ФРГнын ондогон жылдардан берки экономика жана коргонуу жаатындагы саясий салтын олуттуу өзгөрткөн.

Биринчи бештикке ошондой эле Марин Ле Пен — Франциянын улутчул оңчул партиясынын лидери жана Владимир Путин кирди. Путин Politico тарабынан «провокатор» жана Европанын тартиби үчүн башкы коркунуч катары мүнөздөлгөн — Россиянын мүмкүн болгон чабуул коркунучуна байланыштуу.

Рейтингге Германия, Франция, Улуу Британия, Италия, Венгрия, Финляндия, Польша сыяктуу өлкөлөрдүн саясатчылары менен катар эл аралык лидерлер — анын ичинде НАТОнун Башкы катчысы Марк Рютте жана ФИФА президенти Джанни Инфантино да кирди.

Politico Трамптын Европага тийгизген таасири өзгөчө күчтүү болгонун белгилейт: анын чечимдери жана билдирүүлөрү коргонуу бюджеттерин, соода саясаттарын жана ЕБ өлкөлөрүнүн ички саясий артыкчылыктарын өзгөртүп келди. Европалык лидерлер бир тараптан Трамптын таасирин чектөөгө аракет кылса, экинчи тараптан өз алдынча стратегиялык автономияны өнүктүрүүгө умтулушууда.

Басылма белгилеген башка маанилүү тенденциялар: Европада оңчул партияларды колдоо өсүүдө, коргонуу чыгымдары көбөйүүдө, ЕБ өлкөлөрү коопсуздук жана экономика тармагында АКШдан көз карандылыкты азайтууга аракеттенүүдө.