Кыргызстан ЖККУнун төрагасы катары бардык пландарды аткарды – Имангали Тасмагамбетов

Кыргызстан 2025-жылга карата Жамааттык коопсуздук келишим уюмуна (ЖККУ) төрагалык кылуучу өлкө катары бардык пландарын аткарды, - деди уюмдун башкы катчысы Имангали Тасмагамбетов.

"Кыргызстан ЖККУга төрагалык кылуунун артыкчылыктуу багыттарын ишке ашырууга жакындады. Кыргызстан менен ЖККУнун катчылыгынын ортосундагы сапаттуу жана конструктивдүү өз ара аракеттенүүнү, ошондой эле биздин демилгелерибизди жана быйылкы жылга пландаштырылган бардык иш-чараларды толук өз ара түшүнүү жана колдоону белгилегим келет", - деп баса белгиледи Тасмагамбетов.

Ал Кыргызстандын төрагалыгынын артыкчылыктуу багыттарынын бири маалыматтык технологияларды террористтик жана экстремисттик максаттарда колдонуунун алдын алуу жана ага каршы күрөшүү боюнча кызматташууну өркүндөтүү экенин белгиледи. Бул жааттагы ийгиликтер Кыргызстан тарабынан Ысык-Көлдө уюштурулган киберкоопсуздук боюнча эл аралык конференцияда жана атайын уюштурулган кибер машыгууларда белгиленди.

"Жалпысынан акыркы бир нече жылда төрагалык кылып жаткан өлкөнүн бардык пландары аткарылды. Демек, Кыргыз Республикасынын (ЖККУга) төрагалыгынын бир дагы артыкчылыктуу багыты аткарылбай калган жок. Төрагалыктын жыйынтыгы 27-ноябрда Кыргызстандын төрагалыгы астында өтө турган Жамааттык коопсуздук кеңешинин жыйынында чыгарылат. Кыргызстандын төрагалыгы ЖККУга мүчө мамлекеттердин мамлекет башчылары тарабынан жогору бааланат деп ишенем", - деп баса белгиледи уюмдун башкы катчысы.