Үч-Коргон ГЭСин модернизациялоо иштери кандай этапта турат

Кыргызстандын энергетика тармагында маанилүү орунду ээлеген «Электр станциялар» ААКнын филиалы Үч-Коргон ГЭСде модернизациялоо долбоору кызуу фазада уланууда. Бул тууралуу Энергетика министрлигинен билдиришти. 

Бул долбоордун негизги максаты – станциянын техникалык абалын жакшыртуу, электр энергиясын өндүрүүнүн ишенимдүүлүгүн жана натыйжалуулугун жогорулатуу.

Долбоор эки ири пакеттен турат:

• Пакет 1 – Түбүн тазалоочу жабдууларды жана тиешелүү кызматтарды сатып алуу

• Пакет 2 – Электромеханикалык генерациялоочу жабдууларды (ЭМГЖ) жана гидравликалык болот конструкцияларын (ГБК) алмаштыруу

Пакет 2нин алкагында аткарылган негизги иштер:

• 2023-жылдын 28-июлунда көпүрө кранын реконструкциялоо ийгиликтүү аяктаган.

• 2024-жылы Т-2 күч трансформатору 30-октябрда, ал эми 4-гидроагрегат 27-декабрда ишке берилген.

• 2025-жылдын март айында 3-гидроагрегатты реконструкциялоо иштери башталган.

Бүгүнкү күндө аткарылган иштер төмөнкүдөй:

• 3-гидроагрегат толук демонтаждалып, учурда монтаж иштери улантылууда.

• Ток өткөргүч жана генератордук өчүргүч орнотулуп бүткөн.

• Аккумулятордук батарея ишке киргизилген.

• Спирал камерада жана турбина бөлүгүндө механикалык тазалоо, ТВС түтүктөрүн монтаждоо, импульстук түтүктөрдү орнотуу иштери жүрүп жатат.

• Статор жана ротор бөлүктөрүн чогултуу иштери да активдүү фазада.

• SCADA системасынын насостору орнотулуп, автоматтык башкарууга туташтырылууда.

Долбоордун негизги максаттары:

• Үч-Коргон ГЭСин техникалык жактан жаңылоо жана эскирген жабдууларды алмаштыруу.

• Электромеханикалык жабдуулардын кубаттуулугун 20%га чейин жогорулатуу.

• Гидротехникалык конструкциялардын ишенимдүүлүгүн жана коопсуздугун камсыз кылуу.

Үч-Коргон ГЭСин жаңылоо иштери графикке ылайык жүрүп жатат жана 2025-жылдын соңуна чейин кезектеги гидроагрегатты (ГА-3) эксплуатацияга берүү күтүлүүдө.