Лейлекте өрүктүн түшүмдүүлүгү 1,5 эсеге өстү

Баткен облусунун Лейлек районуна караштуу Достук айылындагы “Достук-Кадырбек” айыл чарба кооперативи быйылкы жылы дагы жогорку түшүмгө жетишкендигин билдирди.

Министрликтин колдоосу жана жүргүзүлгөн лабораториялык анализдердин жыйынтыгында өсүмдүктөргө керектүү азык заттар убагында берилген. Натыйжада түшүмдүүлүк 2023–2024-жылдарга салыштырмалуу 1,5 эсеге өстү.

Кооператив жалпы 6 гектар аянттан 16,5 тонна кургатылган өрүк алып, ички жана тышкы рынокко чыгарууга даярдап жатат.

Кооперативдин продукциясы буга чейин да чет өлкөгө экспорттолгон:

•   2022-жылы жеке ишкер менен бирдикте Америка Кошмо Штаттарына,
•   2024-жылы «Бир айыл – бир продукт» долбоорунун алкагында Японияга жөнөтүлгөн.

Учурда болсо кооператив «3+2+1» долбоорунун алкагында иш алып барып, жакшы натыйжаларга жетишүүдө.

Эске сала кетсек, дыйканчылыктын мыкты көрсөткүчтөрүнүн негизинде Эргашев Кабылбек мырза 2025-жылдын январь айында өткөн Министрликтин “Агродиалог” иш-чарасында өрүк өстүрүү боюнча “Чемпион дыйкан” сыйлыгына татыктуу болуп, үлгүлүү дыйкандардын катарын толуктаган.