Депутат мектеп окуу китептерин 25 сомдон ижарага берүүнүн мыйзамдуулугун текшерүүнү талап кылды

Кыргызстандын аймактарындагы мектептерде окуу китептери жетишсиз болуп, жаңы китептерди пайдалануу үчүн ата-энелерден ар бир китепке 25 сомдон ижара акысы талап кылынууда. Ошол эле учурда керектүү окуу китептерин өз алдынча сатып алуу да кыйынчылык жаратууда.

Бул тууралуу депутат Райымберди Дүйшенбиев 28-октябрда Жогорку Кеңештин жыйынында билдирди.

Анын айтымында, айрым мектептерде окуу куралдары бардык окуучуларга жетишсиз. Буга карабастан, мугалимдер жаңы китептерди пайдалануу үчүн акы төлөөнү жана төлөмдү ырастаган квитанцияларды көрсөтүүнү талап кылышууда.

Депутат ата-энелер кыйын абалда калып жатканын белгиледи. Анткени керектүү окуу китептери сатыкта жок болсо да, мектептен алуу үчүн акы төлөөгө туура келүүдө.

Ушуга байланыштуу ал тиешелүү мамлекеттик органдарды ижара акысынын мыйзамдуулугун текшерүүгө жана мектептерди окуу адабияттары менен камсыздоо маселесин иликтөөгө чакырды.

Мындан тышкары, депутат окуучулардын тамак-ашынын коопсуздугу маселесин да көтөрдү. Ал мектептердин жанындагы дүкөндөрдө балдар таттууларды жана тез даярдалуучу азыктарды сатып алып жатканын белгиледи.

Дүйшенбиев мындай соода түйүндөрүндө санитардык талаптардын сакталышын текшерүүнү сунуштады.