Сурабалдиева: Мамлекетке кайтарылган мүлк бийликке жакын адамдардын колуна өтүп кетиши мүмкүн

Жогорку Кеңештин депутаты Эльвира Сурабалдиева мамлекетке кайтарылган мүлктүн мындан аркы тагдыры боюнча маселени көтөрдү.

Ал кыймылдуу мамлекеттик мүлктү менчиктештирүү тартибин эмне үчүн Министрлер кабинетинин өзүнчө чечими менен аныктоо сунушталып жатканын сурады.

Депутаттын айтымында, мындай өзгөртүүлөр мамлекетке кайтарылган объектилер кийин бийликке жакын же ага жеткиликтүүлүгү бар адамдардын колуна өтүп кетүү коркунучун жаратышы мүмкүн.

«Бийлик менчиктештирип, пайдалуу баада алат. Алардын жеткиликтүүлүгү бар. Муну кантип алдын аласыздар?» — деп сурады Сурабалдиева.

Ошондой эле ал менчиктештирүүдө ишканаларды, кыймылдуу жана кыймылсыз мүлктү, ошондой эле алардын финансылык абалын ким баалай турганын тактоону өтүндү.

Жооп иретинде мамлекеттик мүлккө байланыштуу жол-жоболор Мамлекеттик мүлктү башкаруу агенттигинин карамагына кирери айтылды.

Мындан тышкары, айрым учурларда, анын ичинде конфискацияланган же башка жол менен мамлекетке өткөрүлүп берилген мүлккө карата түз сатуу тартиби колдонулушу мүмкүн экени белгиленди. Мамлекеттик мүлктү сатууда белгиленген жол-жоболор сакталары айтылды.

Сурабалдиева мамлекетке кайтарылган активдерди менчиктештирүүнү айрым адамдардын кызыкчылыгында пайдаланууга жол бербеген так механизмдерди карап чыгууну сунуштады.