Бишкекте 5-августтан тартып айрым көчөлөрдө унаа кыймылына убактылуу чектөө киргизилет

Бишкек шаарында жөө жүргүнчүлөрдүн коопсуздугун жогорулатууга жана борбор калаанын транспорттук инфраструктурасын өнүктүрүүгө багытталган жаңы жер алдындагы жөө адамдар өтүүчү өтмөктөрдү куруу долбоору улантылууда.

Курулуш-монтаж иштеринин жүргүзүлүшүнө байланыштуу 2026-жылдын 5-августунан тартып шаардын айрым көчөлөрүндө унаа кыймылына этап-этабы менен убактылуу чектөөлөр киргизилет.

Жер алдындагы жөө адамдар өтүүчү өтмөктөр төмөнкү даректерде курулат:

* Анкара көчөсүндө, «Глобус» соода борборунун жанында;
* Ауэзов көчөсүндө, Аламүдүн кичи районундагы №59/2 үйдүн алдында;
* 7-Апрель жана Ой-Терскен көчөлөрүнүн кесилишине жакын жерде;
* Байтик Баатыр көчөсүндө, курулуп жаткан мечиттин жанында;
* Анкара көчөсүнүн дагы бир тилкесинде (долбоордук документацияга ылайык);
* Нуркамал жана Аалы Токомбаев көчөлөрүнүн кесилишинде.

Долбоордун ишке ашырылышы жөө жүргүнчүлөрдүн коопсуздугун жогорулатып, жол кырсыктарынын тобокелдигин азайтууга, көчө-жол тармагынын өткөрүү мүмкүнчүлүгүн кеңейтүүгө жана жол кыймылынын бардык катышуучулары үчүн ыңгайлуу шарттарды түзүүгө өбөлгө болот.

Курулуш иштери бекитилген графикке ылайык этап-этабы менен жүргүзүлөт.

Бишкек шаарынын мэриясы шаар тургундарын жана конокторун жол жүрүү багыттарын алдын ала пландаштырууга жана убактылуу жол белгилеринин талаптарын так сактоого чакырат.