Бакай-Атада 11 млн сом уурдагандарды президенттин бараарына 4 күн калганда гана эстешкен

Президент Садыр Жапаровдун Бакай-Ата районундагы жолугушуусунда Айгүл аттуу жаран 2022-жылы бюджеттик каражаттардын уурдалганын, бирок айыптуулар толук кандуу жоопкерчиликке тартылбаганын билдирди. 

Айтымында, 2022-жылдын күз айларында райондук билим берүү бөлүмүндө 11 миллион сом уурдалган. Бул ишке 10 адам шектүү болгон. бирок 2024-жылдын жазында алардын төртөөсү, жай мезгилинде бирөөсү камалган. 

“Мен бул боюнча укук коргоо органдарына кайрылдым, эмнеге калган 5 адам жоопко тартылбайт деген маселе менен. Ал жактан кайра мени коркутушуп, жалган жалаа үчүн өзүңүзгө кылмыш ишин козгойбуз дешти”, - деди ал. 

Айтымында, 2026-жылдын февралында дагы бир шектүүгө кылмыш иши козголгон. Ал эми калган төрт адамга кылмыш иши президент Бакай-

Атага келээрине төрт күн калганда гана башталган. 

“Уурдаганга тиешеси бар адамдардын бири да жазасыз калбашы керек”, - деди президент. 

Ал бул ишти тыкыр иликтөөнү прокуратурага тапшырды.