Чүй облусунда 12-14-март күндөрү республикалык машыгуу өтөт
Өзгөчө кырдаалдар министрлиги 12-14-март күндөрү Жарандык коргонуунун башкаруу органдары менен Чүй облусунун аймагында республикалык команда-штабдык машыгуу өткөрөт. Бул тууралуу ведомствонун басма сөз кызматынан билдиришти.
Машыгуу сел кырсыгын алдын алуу, кесепеттерин жоюу темасында өтүп, төмөнкү максаттарды көздөйт:
- жарандык коргонуу мамлекеттик системасынын натыйжалуу иштешин жогорулатуу,
- алдын алуу иш-чараларын өз убагында жүргүзүү,
- мүмкүн болуучу өзгөчө кырдаалдарга чара көрүү даярдыгын камсыз кылуу,
- адамдардын өлүмүнө жол бербөө,
- материалдык зыянды төмөндөтүү.
Ошондой эле алдын ала берилген шашылыш билдирүүлөрдү калкка кабарлоо, катталган кырсыктын масштабына жараша жергиликтүү бийликтин, жарандык коргонуу кызматтарынын даярдыгы, иш-аракеттеринин конкреттүү алгоритмин текшерүү менен баалоо болуп саналат.
Белгилей кетсек, өткөн жылы өлкөдө 339 сел кырсыгы катталып, андан 22 адам каза тапса материалдык чыгым 1 млрд 255 млн 27 миң сомду түзгөн.