Жыл башынан бери Кыргызстанда мейманкана жана ресторан кызматтары дээрлик 23% кымбаттады

Кыргызстанда 2026-жылдын январь–август айларында мейманкана жана ресторан кызматтарынын баасы 22,8% өстү. Бул тууралуу Экономика жана коммерция министрлигинин маалыматында айтылат.

Бул сегмент акы төлөнүүчү кызматтардын кымбатташына эң чоң салым кошуп, өсүшкө 1,43 пайыздык пункт таасир эткен.

Кымбаттоонун негизги себептери катары азык-түлүктүн, анын ичинде эт жана сүт азыктарынын баасынын өсүшү, коммуналдык тарифтердин жогорулашы жана кызматкерлердин эмгек акысына кеткен чыгымдардын көбөйүшү белгиленет.

Мындан тышкары, жай мезгилиндеги туристтик суроо-талаптын жогору болушу, айрыкча Ысык-Көл облусунун курорттук аймактарында, кошумча фактор болгон.

Жалпысынан Кыргызстанда сегиз айда акы төлөнүүчү кызматтардын баасы 11,4% кымбаттады.

Транспорт кызматтары 12,6%, саламаттык сактоо кызматтары 8,2%, эс алуу жана маданий иш-чараларды уюштуруу кызматтары 7,7% өстү.

Билим берүү кызматтарынын баасы 0,4% гана жогорулады. Экономика жана коммерция министрлиги муну 2026/2027-окуу жылына ЖОЖдордо жана колледждерде окуу акысынын жогорулашына киргизилген мораторий менен байланыштырууда.