Ошто аялды өз үйүндө муунтуп өлтүрүп кетишкен. Шектүү кармалды 

Ош шаарындагы адам өлтүрүү фактысынын бети ачылды, деп кабарлайт облустук милициянын басма сөз кызматы.

Маалыматка ылайык, милицияга Ош шаарынын Ак-Тилек кичи районунун тургуну 1987-жылы туулган аял киши колдуу болуп каза болгондугу тууралуу билдирүү түшкөн.

Жерине Ош шаардык милициясынын ыкчам тобу барып, окуя болгон жерге кароо жүргүзүшкөн.

«Аялдын муунтулуп каза болгондугу аныкталган», – деп айтылат маалыматта. 

Жүргүзүлгөн ыкчам издөө иштеринин натыйжасында бул кылмышка шектүү катары Жапалак айылынын 2006-жылы туулган тургуну кармалды.

Тергөө кызматынын маалыматына караганда, шектүү аялдын үйүнө уурулукка кирип, аны муунтуп өлтүрүп, унаасын уурдап кеткен.

«Шектүү мурда бул үйдө квартирант болуп жашап кеткендиги дагы маалым болоду», – деп кошумчалашты милициядан.

Учурда тергөө иштери уланууда, шектүү убактылуу кармоочу жайга киргизилди.