УКМК Эсептөө палатасынын кызматкерлерин кармады

Эсептөө палатасынын кызматкерлери кармалды, деп билдирет УКМКнын басма сөз кызматы. 

Маалыматка ылайык, УКМК КР Эсептөө палатасынын тутумундагы коррупциялык көрүнүштөргө бөгөт коюунун алкагында КР Эсептөө палатасынын Бишкек шаары, Чүй жана Талас облустары боюнча аймактык бөлүмүнүн кызматкерлери тарабынан системалуу түрдө пара алуу жана берүү фактысын аныктады.

Эсептөө палатасынын аталган бөлүмүнүн жетекчиси К.М.М. кызматтык абалынан пайдаланып, кызматтык мөөнөтүнүн кыска мөөнөтүндө аудитордук текшерүүлөрдүн жылдык, кварталдык пландарын даярдоодо жана түзүүдө, ошондой эле текшерүү объекттери боюнча инспекторлорду бөлүштүрүүдө туруктуу коррупциялык схеманы түзгөндүгү такталды. Алсак, К.М.М. белгилүү бир акчалай сыйлык үчүн мамлекеттик инспекторлордун жакындарын максималдуу аярлуу жана финансылык жактан камсыз болгон мамлекеттик жана муниципалдык уюмдарга жөнөткөн, алар кийин объекттердин жетекчилерин опузалап, пара берүүгө көндүрүшкөн.

Ошентип, 2024-жылдын 5-декабрында жүргүзүлгөн тергөө-ыкчам иш-чаралардын алкагында Эсептөө палатасынын аймактык бөлүмүнүн жетекчиси К.М.М., ошондой эле мамлекеттик инспекторлор М.Ж.Д. жана К.Ж.О. кармалып, КР УКМКнын убактылуу кармоочу жайына киргизилди.

Азыркы учурда коррупциялык схеманын башка катышуучуларына карата мындан ары кармоо жана кылмыш жоопкерчилигине тартуу үчүн тиешелүү ыкчам-тергөө иш-чаралар улантылууда.