Казакстанда эң бай жарандарга салык киргизүү сунушталууда

Казакстандын премьер-министри Олжас Бектенов өкмөткө өлкөдөгү өзгөчө бай жарандарга салык салуу боюнча сунуштарды бир айдын ичинде даярдоону тапшырды. Бул тууралуу ТАСС агенттиги өкмөт башчысынын өкмөттүн жыйынында айткан билдирүүсүнө шилтеме берүү менен маалымдады.

Улуттук экономика жана Каржы министрликтерине эл аралык тажрыйбаны изилдеп, ири байлыктын ээлерине салык салуу механизмдерин сунуштоо милдети жүктөлдү.

Ошондой эле Улуттук экономика министрлиги жаңы Салык кодексине киргизиле турган айрым өзгөртүүлөрдүн пакетин толуктап, мамлекеттик органдар менен макулдашуусу керек.

Мындан тышкары, Бектенов салык чогултууну жакшыртууну, көмүскө экономиканын үлүшүн кыскартууну жана салык менен бажы башкаруусун, анын ичинде жасалма интеллектти колдонуу аркылуу, санариптештирүүнү аяктоону талап кылды.

Азырынча сөз тиешелүү сунуштарды иштеп чыгуу жөнүндө гана болуп жатат. Салыктын конкреттүү ставкалары жана жарандарды өзгөчө байлар категориясына киргизүү критерийлери аныктала элек.