Бишкекте Kia унаасынын мас айдоочусу аялдаманы сүзүп, оодарылып кеткен

Бишкекте Kia үлгүсүндөгү унаа коомдук транспорттун аялдамасын сүзүп, оодарылып кеткен.

Postmedia.kg маалымдагандай, айдоочу мас абалында болгон.

Жол кырсыгы 28-октябрда саат 23:44 чамасында Токомбаев көчөсүндө, Чортеков көчөсү менен кесилишкен жерде болгон.

Алдын ала маалымат боюнча, айдоочу рулга ээ боло албай, аялдаманы сүзгөн. Кагылышуунун кесепетинен унаа оодарылып кеткен.

Кырсыктан эч ким жабыркаган эмес.

Медициналык текшерүүнүн жыйынтыгында айдоочунун мас абалында болгону аныкталган.

Учурда кырсыктын жагдайлары такталууда.