Бишкекте жаңы автобус каттамдары ишке киргизилип, эки маршруттун кыймыл схемасы өзгөртүлдү

Бишкекте 11-апрелден тарта жаңы №61, №45 жана №35 автобус каттамдары жүрө баштайт, деп кабарлайт мэриянын басма сөз кызматы. 

№61 автобус каттамы «Киркомстром – Көк-Жар» багыты боюнча жүрөт. Бул каттам шаардагы негизги райондорду аралап өтүп, билим берүү жайларына ыңгайлуу жетүүнү камсыз кылат.

№45 автобус каттамы айланма схема боюнча уюштурулган: «10-кичирайон – Алыкулов көчөсү – 7-Апрель көчөсү». Бул каттам №35 каттамына карама-каршы багытта жүрөт.

Аталган каттамдарда 12 метрлик заманбап,  ISUZU үлгүсүндөгү, газ менен жүргөн жаңы автобустар тейлейт.

Ошондой эле, маршруттук тармакты оптималдаштыруу максатында бир катар каттамдарга өзгөртүүлөр киргизилди.

№51 автобус каттамы эми «Ак-Жол» көзөмөл-өткөрмө пунктунан Беш-Күнгөй айылына чейинки багыт боюнча жүрөт. Мурда бул каттам айланма жол менен жүрсө, эми автобустар Мыктыбек уулу Сарыбагыш, Карагул Ата, 7-Апрель, Курманжан-Датка жана Алма-Ата көчөлөрү аркылуу каттайт.

№9 автобус каттамы да жарым-жартылай өзгөртүлүп, эми автобустар Байтик Баатыр көчөсүнүн ордуна А. Токомбаев жана Токтоналиев көчөлөрү аркылуу жүрөт.

Бул өзгөрүүлөр шаар тургундары жана меймандары үчүн транспорт кызматтарынын сапатын жакшыртуу,  ыңгайлуулукту жогорулатуу максатында киргизилди.