Кыргызстанда алгачкы жолу Business Aviation Summit 2026 өттү

22-сентябрда “Каракол” эл аралык аэропортунда Кыргызстандагы алгачкы Business Aviation Summit 2026 өтүп, ага эл аралык авиация коомчулугунун, бизнес-авиациясвнын, авиакуруу жана ага байланыштуу тармактардын өкүлдөрү катышты. Бул тууралуу  “Кыргызстан аэропорттору” ААК Башкармалыгынын төрагасы Манасбек Самидинов билдирди.

Иш-чарага Asman Airlines, Airbus, Bombardier, ACS Central Asia, COMAC, Kaz Air Jet, Aelia Insurance, Jet24, Volare Aviation, PamAir, Comlux, Flight Consulting Group, Dzun жана башка компаниялардын өкүлдөрү катышты.

Саммиттин негизги максаты Кыргызстандын авиациялык инфратүзүмүнүн жана “Каракол” эл аралык аэропортунун бизнес-авиацияны өнүктүрүү үчүн келечектүү аянтча катары мүмкүнчүлүктөрүн тааныштыруу болду.

Саммиттин катышуучуларынын өзгөчө кызыгуусун Каракол эл аралык аэропортунун перронунда уюштурулган аба кемелеринин статикалык көргөзмөсү жаратты. Анда ар кандай үлгүдөгү бизнес-джеттер, ошондой эле тик учактар көрсөтүлдү.

Өзгөчө көңүл кытайлык компания чыгарган медициналык каттамдарды аткарууга ылайыкташтырылган COMAC учагына бурулду. Ошондой эле перрондо “Asman Airlines” авиакомпаниясына таандык De Havilland Dash 8-400 учагы көрсөтүлдү.

“Business Aviation Summit 2026 иш-чарасынын өткөрүлүшү Кыргызстандын авиация тармагын өнүктүрүүдөгү жана эл аралык авиация коомчулугу менен кызматташтыкты чыңдоодогу дагы бир маанилүү кадам болуп калды” – деп жыйынтыктады “Кыргызстан аэропорттору” ААКтын коммерция боюнча директору Аман Мамаев.