Кыргызстандын жарандык авиациясында советтик үлгүдөгү учактар жана тик учактар калган жок

Кыргызстандын жарандык авиациясында советтик үлгүдөгү учактар жана тик учактар мындан ары эксплуатацияланбайт. Бул тууралуу Жарандык авиация мамлекеттик агенттигинин директору Данияр Бостонов «Биринчи радионун» эфиринде билдирди.

Анын айтымында, мындай чечим советтик үлгүдөгү аба кемелери сапатсыз болгондуктан эмес, аларды тейлөө барган сайын татаалдашып жатканына байланыштуу кабыл алынган.

Тактап айтканда, Ан-12, Ил-76 жана советтик өндүрүштөгү башка учактар үчүн сертификатталган тетиктерди табуу кыйындап баратат.

«Бул аба кемелери үчүн тетиктерди чыгарган заводдордун запастары дүйнө жүзү боюнча түгөнүп баратат», — деди Бостонов.

Мындан тышкары, мындай техниканын эксплуатациясын көзөмөлдөй алган квалификациялуу инспекторлордун жана техникалык адистердин саны да кыскарууда.

Ал эми заманбап учактар санариптик мониторинг жүргүзүүгө, борттук системалардан маалымат алууга жана аба кемелеринин техникалык абалын натыйжалуу көзөмөлдөөгө мүмкүндүк берет.

Мамлекеттик агенттиктин жетекчисинин айтымында, советтик техникалардан баш тартуу Кыргызстандын эл аралык талаптарга шайкештигин ырастоого жана Евробиримдиктин авиациялык «кара тизмесинен» чыгууга шарт түзгөн факторлордун бири болду.