Балдардын эс алуу лагерлери жана ден соолукту чыңдоо комплекси мамлекеттин балансына кайтарылды

КР УКМК мыйзамсыз менчиктештирилген объектилерди, анын ичинде өндүрүштүк жана социалдык объектилерди аныктоо жана мамлекеттин менчигине кайтаруу боюнча жүргүзүлүп жаткан иш-чаралардын жана сотко чейинки өндүрүштүк иштердин алкагында жүргүзүлгөн ыкчам-иликтөө иш-чараларынын жыйынтыгы боюнча Чүй облусунун Аламүдүн районунун Жал айылында жайгашкан «Строитель» (аянты 12,5га) жана «В.Дубинина» (аянты 7,5га) балдардын эс алуу лагерлери, ошондой эле Ысык-Көл районунун Кара-Ой айылындагы курорттук-ден соолукту чыңдоо комплекси (аянты 1га) мамлекеттик баланска кайтарылды.

Аталган социалдык объектилер 1997-жылдан 2001-жылга чейинки мезгилде акционердик коомдордун жана мамлекеттик органдардын өз алдынча чечимдеринин негизинде мыйзамсыз менчиктештирилип, андан кийин балдардын ден соолукту чыңдоо борборлорунун ишмердүүлүгү жокко чыгарылып, мүлктөрү сатылып кеткен.

Жүргүзүлгөн тиешелүү иш-чаралардын натыйжасында, 2025-жылдын 7-июль күнү жогоруда аталган балдардын эс алуу лагерлери жана курорттук-ден соолукту чыңдоо комплекси социалдык багыттарда максаттуу пайдалануу үчүн мамлекеттин балансына кайтарылды.

Учурда КР УКМК мыйзамсыз менчиктештирилген өнөр жай жана социалдык объектилерди мамлекеттин балансына кайтаруу боюнча иш-чараларды улантууда.