Ош шаарында спорттук туризм боюнча дүйнө кубогу старт алды

Ош шаарында алгачкы жолу спорттук туризм багытындагы дүйнө кубогунун расмий ачылыш аземи болуп өттү.

Иш-чарага Ош шаарынын мэринин орун басары Нурлан Закиров, Кыргыз Республикасынын спорт федерациясынын жана Эл аралык федерациянын өкүлдөрү, ошондой эле жаш спорт сүйүүчүлөр катышышты.

Катышуучулар Керме-Тоо кырка тоосунун боорунда тоого чыгуу жана түшүү, тоо шартында жабыркагандарды куткаруу ыкмалары жана практикалык көндүмдөрүн көрсөтүштү.

Маданият башкармалыгы тарабынан даярдалган концерттик программа тартууланып, катышуучулар тарабынан кызыктуу мастер-класстар уюштурулду.

Бул ири спорттук иш-чарага Казакстан, Өзбекстан, Тажикстан, Россия жана Кыргызстандын курама командалары катышууда.

Кубоктук мелдештер 16-ноябрга чейин Керме-Тоо кыркасында уланат.