Кыргызстанда катталган жумушсуздардын саны 38,4 миң адамга чейин кыскарды

Улуттук статистика комитетинин маалыматына ылайык, 2026-жылдын 1-июнуна карата Кыргызстандын мамлекеттик иш менен камсыз кылуу кызматтарында 38 миң 364 жумушсуз жаран каттоодо турган.

Бул көрсөткүч өткөн жылдын ушул эле мезгилине салыштырмалуу 18,2%га, ал эми мурунку айга салыштырмалуу 1%га азайган.

Жумушсуздардын эң көп саны Ош облусунда катталган – 10 миң 858 адам. Андан кийин Жалал-Абад облусу – 9 миң 742 адам, Баткен облусу – 4 миң 398 адам.

2026-жылдын 1-июнуна карата Бишкек шаарында 2 миң 753, ал эми Ош шаарында 3 миң 382 жумушсуз катталган.

Ошол эле учурда өлкөнүн көпчүлүк аймактарында катталган жумушсуздардын саны өткөн жылга салыштырмалуу азайган. Эң олуттуу төмөндөө Баткен облусунда катталып, көрсөткүч өткөн жылдын деңгээлинин 54,6%ын түзгөн. Ошондой эле Бишкек шаарында – 69,2%, Чүй облусунда – 73% болгон.

Ал эми өткөн жылга салыштырмалуу өсүш Ош шаарында гана байкалган. Бул жерде катталган жумушсуздардын саны 2025-жылдын ушул эле мезгилине салыштырмалуу 110,9%ды түзгөн.

Катталган жумушсуздардын жалпы санынын 46%ын аялдар түзөт. Ал эми жумушчу күчүнүн жалпы санына карата катталган жумушсуздуктун деңгээли 1,3% болгон.