Чүй облусунда 76 чакырым СИП-2 аба чубалгысы тартылат

Чүй облусунда 76 чакырым СИП-2 аба чубалгысы тартылат. Бул тууралуу Энергетика министрлигинен билдиришти.

Энергетиктер жыл сайын 1-марттан тарта 1-ноябрга чейин келе жаткан күз-кыш мезгилин ийгиликтүү өтүү үчүн эскирген электр жабдууларын алмаштырып, бузулганын оңдоп, үзүлгөнүн кошуп даярдыктарды көрүшөт.

2025-жылы капиталдык курулуш иштеринин алкагында "КУЭТ" ААКнын филиалы Чүй электр тармактар ишканасынын энергетиктери тарабынан 76 чакырым СИП-2 аба чубалгылары тартылып, 1900 даана темир-бетон электр мамылары орнотулат.

Мындан тышкары, 5 даана трансформатордун кубаттуулугу жогорулатылат. Бардык керектүү жабдуулар “Кыргызстан улуттук электр тармагы” ААКнын өздүк каражатынан камсыздалат.

Маалымат үчүн: Чүй электр тармактар ишканасы Чүй облусунун жашоочуларын жана өндүрүш тармагын электр энергиясы менен камсыз кылган, курамында 9 (Кемин, Чүй, Ысык-Ата, Кант, Аламүдүн, Сокулук, Москва, Жайыл, Панфилов) райондук электр тармактары бар ишкана.

Ишкана облус боюнча 299 373 керектөөчүнү тейлейт.

Бул аткарыла турган иштер Чүй облусунун тургундарын үзгүлтүксүз электр энергиясы менен камсыз кылып, тейлөө сапатын жакшыртат.