“Ош такси” муниципалдык ишканасы түзүлөт

“Ош такси” муниципалдык ишканасы түзүлөт. Бул тууралуу мэр Жеңишбек Токторбаев Ош шаарынын мэриясынын кезектеги коллегиялык жыйынында билдирди.

Анын айтымына караганда, шаарга 5-августка чейин 50 даана электромобиль келет. 

""Ош такси" муниципалдык ишканасын түзөбүз. Аталган унаалардын бардыгы шаардыктарга кызмат көрсөтөт. Акчасы өзүбүзгө түшөт", – деди шаар башчысы. 

Белгилей кетсек, бүгүн, 30-июлда Ош шаарынын мэриясында кезектеги коллегиялык жыйыны өтүп жатат. Ага Ош шаарынын мэри Жеңишбек Токторбаев, шаардык кеңеш төрагасы Болот Баетов, мэрдин орун басарлары, мамлекеттик жана муниципалдык мекеме-ишканалардын жетекчилери катышууда.

Жыйындын күн тартибинде 4 маселе каралууда:

• Ош шаарынын 2025-жылдын биринчи жарым жылдыгындагы социалдык-экономикалык өнүгүүсүнүн жыйынтыктары жана 2025-жылдын экинчи жарым жылдыгына карата милдеттер жөнүндө,

• Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттигинин алдындагы Шаар куруу жана архитектура департаментинин Ош

регионалдык шаар куруу жана архитектура боюнча башкармалыгынын ишмердүүлүгү жөнүндө,

• Мамлекеттик архитектура-курулуш контролдоо департаментинин Ош шаары боюнча мамлекеттик архитектура-курулуш контролдоо башкармалыгынын ишмердүүлүгү жөнүндө,

• Кыргыз Республикасынын Жаратылыш ресурстары, экология жана техникалык көзөмөл министрлигинин Ош аймактык көзөмөл кызматынын аткарып жаткан иштери жөнүндө.

Жогоруда аталган маселелер каралып, аткарылган иштер боюнча баяндамалар жасалып, тиешелүү жетекчилердин маалыматы угулууда.