Кыргызстанда 1-октябрдан тарта пенсияны көтөрүү пландалууда

Кыргызстанда 2025-жылдын 1-октябрынан тарта пенсияны жогорулатуу пландалууда. Тийиштүү токтом долбоорун Социалдык фонд даярдады.

Пенсияларды индексациялоо Социалдык фонддун бюджеттик мүмкүнчүлүктөрүнүн чегинде жыл сайын жүргүзүлөт.

Пенсиялардын камсыздандыруу бөлүгүн индексациялоо коэффициентин 1,10 деңгээлинде белгилөө сунушталууда. Бул пенсионерлердин төмөнкү топторуна таасир этет:

Камсыздандыруу бөлүгү 50 000 сомго чейинки пенсиялар 10%, бирок 600 сомдон кем эмес (эң аз жогорулатуу) жогорулатылат.

Камсыздандыруу бөлүгү 50 миң сомдон ашкан пенсиялар максималдуу 5 миң сомго чейин жогорулатуу менен индексацияланат.

Пенсиялардын камсыздандыруу бөлүктөрүн индексациялоо үчүн талап кылынган жалпы сумма 2 миллиард 43 миллион 874 миң сомго бааланган.

Минималдуу 600 сом аз камсыз болгон пенсионерлерди колдоого багытталган, ал эми 5000 сомдун жогорку чеги бюджеттик каражаттарды сарамжалдуу пайдаланууга багытталган.

Ошондой эле 2025-жылдын 1-октябрынан тартып базалык бөлүгүн эске алуу менен биринчи жолу дайындалган пенсиялар пенсионердин өткөн жылдагы жашоо минимумунан – 7100 сомдон төмөн болбоого тийиш деп белгилөө сунушталууда.

Социалдык фонддун болжолдоолору боюнча, бул күнгө карата өлкөдө 818,7 миңге жакын пенсионер болот, индексациядан кийин орточо пенсия болжол менен 11 226 сомду түзөт.

Маалымат үчүн айта кетсек, 2024-жылы пенсиялар буга чейин эки эсе көбөйгөн: базалык бөлүгү теңдештирилип, камсыздандыруу бөлүгү 18%га же 1000 сомго көбөйгөн. Пенсияга чыгуу курагы аялдар үчүн 58 жаш, эркектер үчүн 63 жаш.