Кытайда болуп көрбөгөндөй сел жүрдү: каза болгондордун саны 40тан ашты

Кытайдын түндүгүндө нөшөрлөп жааган жамгырдан улам болуп көрбөгөндөй сел жүрүп, жер көчкүлөр катталды. 

Акыркы маалыматтарга караганда, табият кырсыгынан кеминде 40 адам каза болду. Пекинде эле 30 тургун набыт тапты, анын 28и тоолуу Миюнь аймагында, дагы экөө Янцинде. Кооптуу аймактардан 80 миңден ашуун адам эвакуацияланды.

Кырсыктан эң көп жабыркаган аймактар борбордун чет жакалары болду: Фаншан, Хуайроу жана өзгөчө Миюнь, бул жерде ошол эле аталыштагы суу сактагычтагы суунун деңгээли 1959-жылы түзүлгөндөн бери эң жогорку чегине жетти. Борбордун кээ бир райондорунда бир нече күндүн ичинде 800 ммге чейин жаан-чачын катталган - мындай көрсөткүчтөр экстремалдуу деп эсептелет. Жолдордун ондогон тилкелери бузулуп, 136 айыл электр жарыгысыз калган.

Суу каптоо коңшулаш Хэбэй провинциясын да каптады: Чэндэ шаарына жакын айылда жер көчкүдөн сегиз адам каза болуп, төртөө дайынсыз болууда.

Кырсыктын шартында Кытайдын төрагасы Си Цзиньпин жергиликтүү бийликти тез арада чара көрүүгө жана жарандардын өмүрүн жана мүлкүн коргоого чакырды. Ал тез арада эвакуациялоо, куткаруу кызматтарын мобилизациялоо жана гидротехникалык курулуштарды көзөмөлдөө зарылдыгын белгиледи. Кытай Эл Республикасынын Мамлекеттик кеңешинин премьери Ли Цян аба ырайына мониторинг жүргүзүүнү жана өзгөчө кырдаалдарга даярдыкты күчөтүүнү тапшырды.

Өзгөчө кырдаалдар министрлиги өзгөчө кырдаалдарга чара көрүүнүн эң жогорку – төртүнчү деңгээлин киргизди. Тургундарга дарыяларга жакын болбоону жана сактык чараларын көрүү сунушталат. Кырсык болгон аймакка жардам көрсөтүүнү координациялоо үчүн жумушчу топтор жөнөтүлдү.