Кыргызстанда көмүр жана руданы көбүрөөк казып ала башташты

2025-жылдын январь–июль айларында Кыргызстандагы өнөр жай өндүрүшүнүн түзүмүндө кайра иштетүүчү тармактардын үлүшү басымдуулук кылууну улантты.

Пайдалуу кендерди казып алуунун үлүшү 9,7%ды, кайра иштетүүчү тармактар – 76,9%ды, электр энергиясы, газ, буу жана кондицияланган аба менен камсыздоо – 12,4%ды, суу менен камсыздоо, тазалоо, калдыктарды кайра иштетүү жана экинчи чийки зат алуу – 1,0%ды түздү.

2025-жылдын январь–июль айларында казып алынган пайдалуу кендердин продукция көлөмү 36 434,9 млн сомду түзүп, 2024-жылдын ушул мезгилине салыштырмалуу 14,6%га өстү. Июль айында көлөм 5 641,7 млн сом болуп, өткөн жылдын июль айына салыштырмалуу 40,7%га өстү.

Айрыкча металл кендерин казып алуу 22,3%га, башка пайдалуу кендер – 19,3%га, көмүр казып алуу – 10,8%га өстү. Ошол эле учурда чийки мунай менен жаратылыш газын казып алуу 8,0%га төмөндөгөн.

Пайдалуу ккендерди казып алуу боюнча маалымат:

• Кара көмүр: январь–июль ичинде 218,6 миң тонна, 2024-жылдын ушул мезгилине салыштырмалуу 2,3% өсүш.
• Күрөң көмүр (лигнит): 1 357,7 миң тонна, өсүш 28,9%.
• Чийки мунай: 157,2 миң тонна, өткөн жылга салыштырмалуу 8% төмөндөө.
• Жаратылыш газы: 15,1 млн м³, 9% төмөндөө.
• Башка пайдалуу кендер (кум, шагыл ж.б.): жалпы өндүрүш көлөмү 2 149,1 миң тоннага жетти.

Металл жана курулуш материалдарын казып алуунун өсүшү, нефть менен газ өндүрүүнүн азайышына карабастан, өлкөнүн курулуш тармагына жана инфраструктурасынын өнүгүшүнө өбөлгө түзүүдө.