Мэрия эскертет! Бишкекте жүк ташуучу унааларга убактылуу чектөөлөр күчүндө

Бишкек шаарынын мэриясы борбор калаада жалпы салмагы 18 тоннадан ашкан оор жүк ташуучу унаалардын муниципалдык унаа жолдорунда жүрүүсүнө убактылуу чектөө киргизилгенин эскертет.

Мэриядан кабарлашкандай, чектөө 2026-жылдын 20-майынан 1-октябрына чейин, күн сайын саат 09:00дөн 19:00гө чейин, абанын температурасы +28 °C жана андан жогору болгон учурда күчүндө болот.

Бул чаралар жолдун асфальт-бетон жабуусун сактоо, анын мөөнөтүнөн мурда бузулушуна жол бербөө жана муниципалдык унаа жолдорунун пайдалануу мөөнөтүн узартуу, ошондой эле жол кыймылынын коопсуздугун камсыз кылуу максатында кабыл алынган.

Бишкек шаарынын мэриясы оор жүк ташуучу унаалардын айдоочуларын жана транспорттук компанияларды маршруттарды пландаштырууда белгиленген чектөөлөрдү эске алууга жана коюлган талаптарды сактоого чакырат.

Чектөөлөр күчүндө болгон мезгилде оор жүк ташуучу транспорттун кыймылын мүмкүн болушунча аба ырайынын температуралык режимин эске алуу менен алдын ала пландаштырып, сапарларды белгиленген убакыттан тышкары аткаруу сунушталат.