Кыргызстандыктар Wildberries жана Ozon маркетплейстеринде сатып алууларды «Элкарт» менен төлөй алышат

Улуттук «Элкарт» төлөм картасын кадимки дүкөндөрдө жана POS-терминалдарда гана эмес, интернет аркылуу сатып алуулар үчүн да колдонсо болот. Бул тууралуу «Банктар аралык процессинг борбору» ЖАКтын башкармалыгынын төрагасы Алтымыш Туратбеков түз эфирде билдирди.

Анын айтымында, кыргызстандыктардын керектөө адаттарынын өзгөрүшүнө байланыштуу «Элкарттын» төлөм инфраструктурасы акырындык менен кеңейүүдө.

Тактап айтканда, улуттук карталарды интернет аркылуу буйрутма берүүдө колдонууга болот.

Туратбеков ошондой эле популярдуу маркетплейстерди «Элкарт» системасына кошуу боюнча иштер жүрүп жатканын билдирди. Түз эфирде ал Wildberries жана Ozon платформаларын атап өттү.

Анын айтымында, интернет аркылуу төлөмдөрдү өнүктүрүү улуттук төлөм системасын модернизациялоонун негизги багыттарынын бири болуп саналат.

Ошол эле учурда «Элкарт» карталары Кыргызстан ичинде товарларга жана кызмат көрсөтүүлөргө POS-терминалдар аркылуу төлөө үчүн колдонулуп келет.