МКУ камсыздандыруу төлөмдөрүнөн баш тартуунун негизги себептерин атады
Камсыздандыруу компаниясы болгон окуя полисте каралган тобокелдиктерге кирбесе же кырсык болгон учурда камсыздандыруу келишими күчүнө кире элек болсо, төлөм жүргүзүүдөн баш тартышы мүмкүн. Бул тууралуу 14-августта Бишкекте өткөн маалымат жыйынында "Мамлекеттик камсыздандыруу уюму" ААКтын Камсыздандыруу төлөмдөрү жана ордун толтуруулар башкармалыгынын башчысынын орун басары Наталья Аттаева билдирди.
Анын айтымында, төлөмдөн баш тартуунун негиздери мыйзамдар менен аныкталат жана камсыздандыруу уюму аларды өз алдынча белгилей албайт.
Тактап айтканда, турак жайдын ар бир эле бузулушу камсыздандыруу окуясы болуп эсептелбейт. Мисалы, кадимки жаан-чачындын өзү камсыздандыруу тобокелдигине кирбейт. Ал эми камсыздандыруу шарттарында каралган өрт, сел жана башка өзгөчө кырдаалдардын кесепеттери үчүн компенсация төлөнүшү мүмкүн.
Төлөмдөн баш тартуунун дагы бир себеби — колдонуудагы камсыздандыруу полисинин жоктугу. Эгер кырсык камсыздандыруу таризделгенге чейин болсо, келтирилген зыян үчүн компенсация алуу мүмкүн эмес.
Ошондой эле полис үчүн төлөм жүргүзүлүшү керек. Камсыздандыруу төгүмү төлөнмөйүнчө камсыздандыруу коргоосу күчүнө кирбейт.
Турак жайдын ээси атайылап зыян келтиргени аныкталса да компенсация төлөөдөн баш тартылышы мүмкүн. Мамлекеттик камсыздандыруу уюму мисал катары камсыздандыруу төлөмүн алуу максатында мүлктү атайылап өрттөөнү келтирди.
Компенсация алуу үчүн камсыздандыруу уюмуна кайрылып, камсыздандыруу окуясы боюнча акт түздүрүп, тиешелүү тастыктоочу документтерди берүү зарыл. Окуянын мүнөзүнө жараша камсыздандыруу окуясынын болгонун ӨКМ, Кыргызгидромет жана башка компетенттүү органдар тастыктай алат.
Документтердин толук топтому берилгенден кийин камсыздандыруу уюму материалдарды карап чыгып, 30 күндүн ичинде төлөм жүргүзүү же андан баш тартуу тууралуу чечим кабыл алат.
Мындан тышкары, жаран баш тартуу чечимине, анын ичинде сот тартибинде, даттанууга укуктуу. Камсыздандыруу уюму кабыл алган чечиминин себептерин түшүндүрүүгө милдеттүү.