Кыргызстан менен Казакстан санариптик кызматташтыкты кеңейтүүдө

Кыргызстан менен Казакстандын санариптик мекемелеринин жетекчилери жолугушту. Бул тууралуу ведомствонун басма сөз кызматынан кабарлашты. 

Тараптар эки өлкөнүн ортосундагы санарип айдыңындагы негизги долбоорлорду талкуулашты:

Жакынкы чек ара аймактарында радио жыштыктарды координациялоо – келишим боюнча иштер уланууда, Казакстандын сунуштары күтүлүүдө.

Санариптик документтерди өз ара таануу – Казакстан менен тиешелүү келишимди түзүү маселеси каралууда, интеграция механизмдери жана колдонуу чөйрөсү талкууланууда.

Космостук кызматташтык – Кыргызстанды Жерди дистанттык зонддоо спутниктик топтомуна кошуу мүмкүнчүлүгү каралууда.

Адистерди даярдоо – кыргызстандык инженерлерди Түрк мамлекеттер уюмунун алкагында окутуу маселеси талкууланууда.

Белгилей кетсек, тараптардын жолугушуусу КР министрлер кабинетинин төрагасы Казакстанга болгон расмий сапарынын алкагында өткөн.