Корумду чокусунда жоголгон альпинисттердин сөөгү табылды – аларды түшүрүү операциясына даярдык көрүлүүдө
Кыргызстандагы Корумду чокусунда үч чет элдик альпинистти – Беларустун эки жана Литванын бир жаранын издөө боюнча операциянын издөө этабы аяктады. Куткаруучулар алардын кулаган жерин болжолдуу аныктап, сөөктөрүн табышты. Бул тууралуу Туризмди өнүктүрүү боюнча мамлекеттик агенттиктин директору Эдуард Кубатов билдирди.
Анын айтымында, издөө иштерине бийик тоолуу аймактарда, 6–6,5 миң метр бийиктикте иштөө боюнча квалификациясы бар операторлор жана бийик тоолуу дрондор да тартылган.
«Үч альпинисттин кулаган жерин болжолдуу аныктадык. Алардын кулаганын жана сөөктөрү жаткан жерди каттадык. Ушуну менен Корумду чокусундагы издөө иштери аяктады», – деди Кубатов.
Эми операциянын экинчи этабы – каза болгондор табылган жерге түз жетүү иштери башталат.
Топту Кыргызстандын алдыңкы альпинисттеринин бири жетектейт. Анын курамына кесипкөй бийик тоолуу альпинисттер кирет.
Алар альпинисттер кулаган жерге жетип, каза болгондордун өздүгүн аныктоону жүргүзүшөт. Андан соң сөөктөрдү Корумду чокусунан Ош шаарына жеткирүү иштери башталат.
Кубатовдун айтымында, операция чоку аймагындагы аба ырайы турукташары менен жакынкы күндөрү башталышы мүмкүн.
Сөз Беларустун 43 жаштагы Максим Полянский жана 60 жаштагы Николай Свиридов аттуу жарандары, ошондой эле Литванын 37 жаштагы Сергей Рубцов аттуу жараны тууралуу болуп жатат. Полянский менен Свиридов «Илбирс» альпинисттик наамынын ээлери.
Альпинисттер 4-августта Корумду чокусуна чыыккандан кийин байланышка чыкпай калышкан. Түшө баштаардын алдында алар оператор менен байланышып, базалык лагерге багыт алып жатышканын билдиришкен. Бирок белгиленген убакта лагерге келишкен эмес.
Андан кийин Беларустун Альпинизм жана аскага чыгуу федерациясы издөө иштерин уюштурууга жардам берүү өтүнүчү менен кыргызстандык кесиптештерине кайрылган.
16-августта издөө операциясынын жүрүшүндө дрон кар-мүрлүү массасы түшкөн аймакты тартып алган. Жазууларды кийинчерээк изилдөө учурунда альпинисттердин буга чейин табылган буюмдарынын жанынан болжолдуу түрдө дайынсыз жоголгон адамдардын сөөгү болушу мүмкүн болгон объекттер байкалган.
Кийинки издөө иштеринин натыйжасында альпинисттер кулаган жер дагы так аныкталган. Каза болгондордун өздүгү кесипкөй топ аларга жеткенден кийин толук такталат.