Энергетика министрлиги транспортту электр энергиясына өткөрүү боюнча долбоорлорду электр менен камсыздоого даяр

Энергетика министрлиги транспортту электр энергиясына өткөрүү боюнча долбоорлорду электр менен камсыздоого даяр. Бул тууралуу энергетика министринин орун басары Насипбек Керимов радио эфиринде билдирди.

Анын айтымында, мамлекеттик органдардан же ишканалардан тиешелүү кайрылуулар түшсө, министрлик транспортту электр энергиясына өткөрүү боюнча долбоорлорду карап чыгып, аларды электр энергиясы менен камсыздоого даяр.

Керимов белгилегендей, учурда өлкөдө электр энергиясынын тартыштыгы бар экенине карабастан, министрлик калкты, бизнес өкүлдөрүн жана өнөр жай объектилерин керектүү көлөмдө электр энергиясы менен камсыздап жатат.

Министрдин орун басары жакынкы жылдары Кыргызстандагы транспорттун бир бөлүгү сөзсүз түрдө электр энергиясына өтүшү керектигин айтты.

«Каалайбызбы же жокпу, жакынкы жылдары Кыргызстандагы техникалардын бир бөлүгү электр энергиясына өтүүгө тийиш», — деди ал.

Ал ошондой эле Бишкек шаарындагы автобустардын басымдуу бөлүгү жаратылыш газына өткөрүлгөнүн эске салып, бул салттуу күйүүчү майды керектөөгө болгон жүктү азайтарын белгиледи.

Мындан тышкары, электробустардын санын көбөйтүү энергия булактарын диверсификациялоонун негизги багыттарынын бири болуп саналат.

Керимов кошумчалагандай, мамлекеттик программалардын алкагында бюджеттик мекемелерди жана айрым ишканаларды этап-этабы менен электр транспортуна өткөрүү маселеси да каралууда.