Түндүк-Түштүк альтернативдик жолунда 40ка жакын коргоочу курулмалар пайда болот

Түндүк–Түштүк альтернативдүү унаа жолунда жер көчкү жана таш кулоо коркунучун азайтуу үчүн 40ка жакын коргоочу инженердик курулма куруу пландалууда. Бул тууралуу Кыргызстандын транспорт жана коммуникациялар министри Талантбек Солтобаев «Ачык кабинет: жоопкерчилик аймагы» долбоорунун алкагында берген маегинде билдирди.

Анын айтымында, жол кыймылынын коопсуздугун камсыздоо боюнча иштер буга чейин эле башталган.

Учурда Казарман–Арал жолунун кооптуу тилкелеринде тирөөч дубалдарды куруу иштери жүргүзүлүүдө. Долбоор толук ишке ашкандан кийин транспорттук каттамдардын ишенимдүүлүгү жогорулап, айдоочулар менен жүргүнчүлөр үчүн жаралышы мүмкүн болгон коркунучтар кыйла кыскарат.

Министр ошондой эле өлкөдөгү башка ири инфраструктуралык долбоорлордун жүрүшүнө да токтолду.

Анын белгилешинче, аймактагы транспорттук-логистикалык байланыштарды кеңейтүүдө өзгөчө мааниге ээ болгон Кытай–Кыргызстан–Өзбекстан темир жолунун курулушу пландалган график боюнча уланууда.

Мындан сырткары, Ала-Бука–Чаткал жана Барскоон–Бедел автожолдорунда курулуш жана оңдоо иштери жүргүзүлүп жатат. Ошондой эле Бишкек–Кант–Токмок жана Лебединовка–ГЭС-5 жолдорун реконструкциялоо долбоорлору да активдүү ишке ашырылууда.

Транспорт министрлигинин башчысы белгилегендей, өлкөнүн транспорттук инфраструктурасын өнүктүрүү мамлекеттик саясаттын артыкчылыктуу багыттарынын бири бойдон калууда.

Учурдагы бардык негизги долбоорлор белгиленген мөөнөттөрдүн алкагында аткарылып, аймактардын транспорттук жеткиликтүүлүгүн жакшыртууга, ички жана эл аралык байланыштарды бекемдөөгө, ошондой эле жол кыймылынын коопсуздугун жогорулатууга багытталган.