Кыргызстандыктардын 6% гана жайкы эс алуу маалында жумуштан толугу "алыстайт"

Кыргызстандыктардын көбү жайкы эс алууну пландаштырганда биринчи кезекте үй-бүлөнүн кызыкчылыгын эске алышат. Бул тууралуу иш берүүчүлөр менен жумуш издөөчүлөрдүн арасында жүргүзүлгөн сурамжылоонун жыйынтыгы көрсөттү.

Изилдөөгө ылайык, сурамжылоого катышкандардын 58%ы эс алуу убактысын тандоодо үй-бүлөгө ыңгайлуулукту башкы критерий катары белгилешкен. Ал эми 36%ы жумуштагы жүктөмгө көңүл бурса, 32%ы саякаттын же эс алуунун баасына жараша чечим кабыл алышат. Дагы 26%ы аба ырайын эске алышса, 17%ы эс алуу мөөнөтүн кесиптештери менен макулдашуу маанилүү экенин айтышкан.

Жай мезгилинде көпчүлүк үчүн жумуштун ыргагы өзгөрбөйт. Сурамжылоого катышкандардын 45%ы жумуш жүктөмү мурдагыдай эле каларын билдиришкен. Дагы 25%ы иш көлөмү бир аз азаярын айтышса, 21%ы тескерисинче көбөйөрүн белгилешкен. Ал эми 9%ы жумуш тапшырмалары кыйла көбөйөрүн билдирген.

Эс алуу учурунда да көптөгөн кызматкерлер жумуш маселелеринен толук ажырай алышпайт. Катышуучулардын 43%ы шашылыш билдирүүлөргө жана чалууларга кээде жооп берип турушарын айтышкан. 31%ы дээрлик дайыма байланышта болушса, 19%ы мындай учурлар өтө сейрек кездешерин белгилешкен. Болгону 6%ы гана эс алуу маалында жумуштан толугу менен алыстай аларын билдирген.

Кыргызстандыктар жакшы эс алуунун негизги жыйынтыгы катары жаңы таасирлерди жана жагымдуу эмоцияларды аташкан — мындай жоопту катышуучулардын 64%ы тандаган. Жумуштан алаксып эс алуу 58%ы үчүн маанилүү болсо, күч-кубатты толук калыбына келтирүү 56%ы үчүн маанилүү. Ал эми 55%ы үй-бүлө жана жакындары менен убакыт өткөрүүнү эң негизги баалуулук катары эсептешет.

Ошентип, көпчүлүк кыргызстандыктар үчүн эс алуу жөн гана чөйрөнү алмаштыруу эмес, күч топтоп, жумуш менен жеке жашоонун ортосундагы тең салмактуулукту табуунун маанилүү жолу бойдон калууда. Бирок заманбап эмгек адаттары көрсөткөндөй, кызматкерлердин басымдуу бөлүгүнө эс алуу учурунда да жумуш байланыштарынан толук баш тартуу оңой эмес.