Жалал-Абаддагы коммуналдык кызматтарга 19 унаа тапшырылды 

Жалал-Абаддагы коммуналдык кызматтарга атайын унаалар тапшырылды. Бул тууралуу шаардык мэриянын маалымат борбору билдирет.

Маалыматка ылайык, ачкычтарды бүгүн, 16-июнда Жалал-Абад шаарынын мэри Эрнисбек Ормоков тапшырган. 

Автоунаалар төмөнкү кызматтарга берилди:

• "Жалал-Абад Тазалык" мекемесине,
• "Жалал-Абадсууканал" башкармалыгына,
• Көрктөндүрүү жана жашылдандыруу чарбасына,
• Жол башкармалыгына,
• Коммуналдык чарба жана көрктөндүрүү департаментине.

19 унаанын экөө жергиликтүү бюджеттен алынса, калганы Мамлекеттик лизинг компаниясы аркылуу сатып алынды.

Белгилей кетсек, Жалал-Абад шаарынын мэриясынын коммуналдык мекемелерине Мамлекеттик лизинг компаниясы аркылуу жалпы 32 даана атайын техника сатып алуу боюнча келишим түзүлгөн. Бүгүн алардын 17си келди. Алдыда дагы 15 атайын техника келиши күтүлүүдө.