Кыргызстанда жыл башынан бери дизель майы 25,1%га, бензин 16,8%га кымбаттады

Кыргызстанда күйүүчү-майлоочу материалдардын баасы 2026-жылдын башынан бери 15%га өстү. Бул тууралуу Экономика жана коммерция министрлигинин өлкөнүн социалдык-экономикалык өнүгүүсү боюнча баяндамасында айтылат.

Эң көп дизель майы кымбаттап, анын баасы 25,1%га жогорулаган. Бензиндин баасы 16,8%га өскөн.

Ведомствонун маалыматы боюнча, баалардын өсүшүнүн негизги себептеринин бири россиялык мунайды кайра иштетүүчү заводдордун дүң-сатуу бааларынын жогорулашы болгон. Бул Кыргызстанга импорттолгон күйүүчү майдын баасына таасирин тийгизген.

Мындан тышкары, чек ара аралык темир жол логистикасынын кымбатташы да кошумча фактор болгон.

Өлкө ичинде бааларга сезондук суроо-талап да таасирин күчөткөн. Август айында айыл чарба иштеринин түшүм жыйноо мезгилине, жайкы туристтик сезонго жана автоунаа агымынын, анын ичинде Ысык-Көл облусуна болгон каттамдардын көбөйүшүнө байланыштуу күйүүчү-майлоочу материалдарды керектөө өскөн.

Жүк ташуучулар тарабынан да суроо-талап жогору бойдон калган.

Экономика министрлигинин маалыматына ылайык, күйүүчү-майлоочу материалдардын кымбатташы жалпы инфляциянын деңгээлине 0,33 пайыздык пункт өлчөмүндө таасир тийгизген.