ДБ: Европа жана Борбор Азиядагы компаниялардын 10 пайызына жетпегени жасалма интеллектти колдонот

Европа жана Борбор Азия өлкөлөрүндөгү компаниялардын 10 пайызына жетпегени жасалма интеллектти күнүмдүк ишмердүүлүгүндө колдонушат. Бул көрсөткүч Европа биримдигиндегиге салыштырмалуу дээрлик эки эсе төмөн. Бул тууралуу Дүйнөлүк банктын докладында айтылат.

Компаниялардын көпчүлүгү жасалма интеллектти азырынча чат-боттордун иштеши, ички маалымат базаларын түзүү, документтерди даярдоо жана кеңсе иштерин колдоо сыяктуу салыштырмалуу жөнөкөй тапшырмаларда колдонушат.

Айрым учурларда бул технологиялар тапшырмаларды аткарууга кеткен убакытты эки жумадан бир нече саатка чейин кыскартууга мүмкүндүк берген.

Бирок ишканалардын аз гана бөлүгү жасалма интеллектти негизги бизнес-процесстерине түздөн-түз интеграциялаган.

Дүйнөлүк банк мындай технологияларды колдонуунун өнүккөн мисалдары катары каржы уюмдарынын насыя алуу өтүнмөлөрүн баалоодо, соода компанияларынын товардык запастарды толуктоодо, ал эми энергетикалык ишканалардын өндүрүштүк ресурстарды оптималдаштырууда жасалма интеллектти колдонушун белгилейт.

Ошол эле учурда жасалма интеллектти кеңири жайылтууга тоскоол болгон негизги факторлордун катарында башкаруу жаатындагы компетенциялардын жетишсиздиги, маалыматтардын талаптагыдай даярдалбаганы жана аларды бириктирүүдөгү кыйынчылыктар бар.