Кыргызстанда кумшекер 5,8% кымбаттады – Экономика министрлиги баанын өсүшүн түшүндүрдү

Кыргызстанда 2026-жылдын башынан бери кумшекердин баасы 5,8%га өстү. Бул тууралуу Кыргызстандын Экономика жана коммерция министрлигинен билдиришти.

Министрлик баанын өсүшүнүн себептеринин бири катары дүйнөлүк котировкалардын жогорулашын атады.

Сентябрь айында БУУнун Азык-түлүк жана айыл чарба уюмунун (ФАО) кантка болгон баа индекси август айындагы көрсөткүчкө салыштырмалуу 6,1%га, ал эми 2025-жылдын сентябрына салыштырмалуу 14,7%га жогору болгон.

Ведомствонун маалыматына ылайык, бул дүйнөлүк рынокто канттын сунушу кыскарышы мүмкүн деген күтүүлөргө байланыштуу. Атап айтканда, Европада кант кызылчасынын түшүмүнүн азайышы, Индия менен Таиланддагы түшүм боюнча жагымсыз божомолдор жана Бразилияда кант камышын жыйноодогу көйгөйлөр баага таасир эткен.

Ички рынокто баанын өсүшүнө август–сентябрь айларында суроо-талаптын сезондук көбөйүшү да себеп болгон. Бул мезгилде калк жана ишканалар кышка даярдык көрүү, жашылча-жемиштерди консервалоо жана суусундуктарды өндүрүү үчүн кантты көп көлөмдө сатып алышат.

Мындан тышкары, министрлик жергиликтүү кант кызылчасынан өндүрүлгөн канттын көлөмү чектелүү экенин жана жайдын аягына карата кампалардагы запастар азайганын белгиледи.