РКӨФ Кыргызстанда жалпы кубаттуулугу 600 МВттан ашкан 16 энергетикалык долбоорду ишке ашырууда

РКӨФ Кыргызстанда жалпы кубаттуулугу 600 МВттан ашкан 16 энергетикалык долбоорду ишке ашырууда. Бул тууралуу Россия-Кыргыз өнүктүрүү фондунун Башкармалыгынын төрагасы Артем Новиков «Биринчи радионун» эфиринде билдирди.

Анын айтымында, аталган объекттер ишке киргенден кийин жылына 1,5 млрд кВт·сааттан ашык электр энергиясын өндүрүүгө мүмкүнчүлүк түзүлөт.

Новиков белгилегендей, электр энергиясынын тартыштыгы жана Кыргызстанда импортко болгон көз карандылык күчтүү шартта ата мекендик генерацияны көбөйтүү өзгөчө маанилүү.

Фонддун колдоосу менен буга чейин 8-9га жакын энергетикалык объект ишке киргизилген. 2026-жылдын аягына чейин дагы 3-4 электр станциясын ишке киргизүү пландалууда. Калган долбоорлор келерки жылы иштей баштайт.

Ири долбоорлордун бири — кубаттуулугу 300 МВт болгон күн электр станциясы. Новиковдун маалыматына караганда, анын биринчи баскычы 31-августка чейин электр энергиясын тармакка бере башташы керек. Объектти толугу менен декабрь айында ишке киргизүү пландалууда.

Дагы бир ири долбоор — кубаттуулугу 100 МВт болгон Куланак ГЭСи. Аны келерки жылы ишке киргизүү каралган. Учурда станциянын курулушу активдүү жүрүп жатат.