Темир Сариев: Кыргызстан соодадан биргелешкен өндүрүшкө өтүшү керек

Кыргызстандын Соода-өнөр жай палатасынын президенти Темир Сариев чет өлкөлүк өнөктөштөр менен жөн гана соода жүргүзүүдөн биргелешкен өндүрүштү өнүктүрүүгө өтүү зарылдыгын белгиледи. Бул тууралуу ал Бишкекте өткөн KYRGYZSTAN EXPO 2026 эл аралык көргөзмөсүндө билдирди.

Сариевдин айтымында, Кыргызстан үчүн сооданы кеңейтүү менен гана чектелбестен, технологияларды тартуу, биргелешкен ишканаларды түзүү жана атаандаштыкка жөндөмдүү ата мекендик продукциянын көлөмүн көбөйтүү маанилүү.

«Соода өлкөлөрдү жакындаштырат, өндүрүш экономиканы бекемдейт. Атаандаштык сапатты жаратат, кызматташтык мүмкүнчүлүктөрдү ачат. Бирок бизнестин эң баалуу жетишкендиги — адамдардын ортосундагы ишеним. Чоң өнөктөштүк дал ушул ишенимден башталат», — деди ал.

Соода-өнөр жай палатасы эл аралык көргөзмөлөр кыргызстандык компанияларга кадимки сатып алуу-сатуу мамилелеринен чыгып, кызматташуунун терең формаларына өтүүгө шарт түзөрүн белгилейт.

Анын ичинде чийки затты биргелешип кайра иштетүү, өндүрүштү жергиликтештирүү, технология алмашуу жана тышкы рынокторго багытталган продукция чыгаруу каралган.

Палатанын пикиринде, мындай ыкма узак мөөнөттүү экономикалык натыйжа берип, жаңы жумуш орундарын түзүүгө, салыктык түшүүлөрдү көбөйтүүгө, тармактардын өнүгүшүнө жана экспортту кеңейтүүгө өбөлгө болот.

Мындан тышкары, чет өлкөлүк компаниялар менен кызматташуу заманбап технологияларды киргизүүгө, өндүрүштү автоматташтырууга, продукциянын сапатын жогорулатууга жана квалификациялуу адистерди даярдоого жардам берет.

Соода-өнөр жай палатасы эл аралык көргөзмөлөрдүн негизги жыйынтыгы кол коюлган келишимдер менен гана чектелбестен, Кыргызстанда жаңы ишканалардын жана өндүрүштөрдүн ачылышы болушу керектигин баса белгиледи.