Кумшекер 5,6%, буудай 5,8% кымбаттады: дүйнөлүк азык-түлүк баалары кайра өстү

Июль айында дүйнөлүк азык-түлүк баалары өсүшүн улантты.

БУУнун Азык-түлүк жана айыл чарба уюмунун (ФАО) азык-түлүк бааларынын индекси 131,1 пунктту түзүп, июнь айындагы көрсөткүчтөн 0,6% жогорулады. Өткөн жылдын ушул мезгилине салыштырмалуу өсүш 1% болду.

Дан эгиндеринин ичинен буудайдын баасы эң көп – 5,8% өстү. Буга Кара деңиз аркылуу экспорттун үзгүлтүккө учурашы мүмкүн деген кооптонуулар, ошондой эле негизги өндүрүүчү өлкөлөрдө аба ырайынын кескин ысышынын түшүмгө тийгизген таасири себеп болду.

Жүгөрүнүн баасы АКШнын айрым аймактарындагы ысык жана кургак аба ырайынан, ошондой эле энергетикалык ресурстардын кымбатташынан улам 3,6% жогорулады. Күрүчтүн баасы дээрлик өзгөргөн жок.

Өсүмдүк майларынын индекси 2% өсүп, 2022-жылдын июнь айынан берки эң жогорку деңгээлге жетти. Пальма жана соя майлары кымбаттаса, күн карама жана рапс майларынын баасы төмөндөдү.

Айрым категориялардын ичинен кумшекердин баасы эң көп – 5,6% өстү. Буга Европа биримдигиндеги ысык жана кургакчылыкка байланыштуу кооптонуулар, ошондой эле «Эль-Ниньо» кубулушунун Азия өлкөлөрүндөгү өндүрүшкө тийгизиши мүмкүн болгон таасири себеп болду.

Ошол эле учурда июль айында эттин баасы 2,8% төмөндөдү. Бул жыл башынан берки биринчи төмөндөө болуп, июндагы рекорддук көрсөткүчтөн кийин катталды. Канаттуулардын этинин, чочконун жана уйдун этинин дүйнөлүк баалары арзандаса, кой этинин баасы жаңы рекорддук деңгээлге жетти.

Сүт азыктарынын баасы орточо эсеп менен 0,7% төмөндөдү. Кургак сүт менен сары май арзандаса, сырдын баасы бир жыл ичинде биринчи жолу өстү.