Кыргызстанда айыл чарба өсүмдүктөрүн жыйноо иштери аяктады

Республикада айыл чарба өсүмдүктөрүн жыйноо иштери аяктады, деп билдирет Улуттук статистика комитети.

Маалыматка ылайык, 2024-жылдын аягында 599,5 миң гектар аянттан дан эгиндери жыйналды. Чабылган аянттан 2,1 миллион тонна дан бастырылды (тазалангандан кийинки салмак боюнча буурчак, күрүч жана гречканы кошпогондо), бул өткөн жылга салыштырмалуу 28,4%га көп. Дан эгиндеринин орточо тушүмдүүлүгү гектарына 35 центнерге жакын болду.

Өткөн жылдын ушул мезгилине салыштырмалуу арпанын дүң жыйымы - 59,9%, буудайдын - 51,0%, кант кызылчасынын - 54,2%, мөмө-жемиш өсүмдүктөрүнүн - 24,1% жана бакча өсүмдүктөрүнүн дүң жыйымы - 19,1% га өскөн. Өндүрүштүн өсүшү арпанын — 8,9 центнерге, буудайдын — 8,6га, кант кызылчасынын — 237,1ге ,бакча өсүмдүктөрүнүн — 19,1 жана мөмө-жемиш өсүмдүктөрүнүн – 5,5 центнерге түшүмдүүлүктүн жогорулашы менен байланыштуу.

Муну менен катар, өткөн жылга салыштырмалуу тамекинин - 32,9%, пахтанын - 27%, картошканын - 7,5% дүң жыйымы азайган. Дүң түшүмдүн азайышы, 2024 - жылдын түшүмү үчүн айдоо аянттарынын тамеки - 42,0%, пахта - 26,9%, картошка – 8,4% га төмөндөшү менен шартталган.