Дастан Бекешев: Жапырт бак-дарак отургузуунун ордуна, биз аларды кыйып жатабыз

Жогорку Кеңештин депутаты Дастан Бекешев Бишкек шаарында бак-дарактардын массалык кыйылышын сынга алып, жолдорду кеңейтүү жашыл аймактарды кыскартуунун эсебинен жүргүзүлбөшү керектигин билдирди.

Анын айтымында, борбор калаада бак-дарактарды массалык түрдө отургузуу тууралуу айтылганына карабастан, тескерисинче алардын активдүү кыйылып жатканы байкалууда. Бул көрүнүш экологиялык абалга жана шаар тургундарынын жашоо сапатына терс таасирин тийгизиши мүмкүн.

Эл өкүлү Кыргыз Республикасынын Жаратылыш ресурстары, экология жана техникалык көзөмөл министрлигин кырдаалга кийлигишип, жашыл бак-дарактарды кыюуну токтотууга чакырды. Ал буга чейин жашыл аймактарды коргоого багытталган бир катар сунуштарды демилгелегенин да эске салды.

Тактап айтканда, Бекешев төмөнкү чараларды сунуштаган:

• парктар, скверлер жана бульварлардын аянтын кыскартууга тыюу салуу;
• бак-дарактарды кыюуда милдеттүү экологиялык экспертизаны жүргүзүү;
• бардык жашыл көчөттөрдү санариптик каттоого алып, ачык реестр түзүү;
• жашыл аймактарды сактабастан курулуш жүргүзүүгө тыюу салуу;
• дарактарды бузгандыгы үчүн, анын ичинде курулуш иштеринде, жоопкерчиликти күчөтүү.

Демилгенин негиздеме маалымкатында мыйзам долбоору калктуу конуштарда мыйзамсыз курулуш жана бак-дарактарды массалык түрдө кыюу учурлары көбөйгөндүгүнө байланыштуу иштелип чыкканы белгиленген.

Тиешелүү чаралар кабыл алынса, өлкөнүн «жашыл каркасын» коргоо системасы калыптанып, Кыргызстандын шаарларында экологиялык коопсуздук деңгээли жогорулайт деп күтүлүүдө.