Кыргызстанда браконьерликке каршы күрөшкө кошкон салымы үчүн егерлер жана активисттер сыйланды

Кыргызстанда браконьерликке каршы күрөшкө кошкон салымы үчүн егерлер жана активисттер сыйланды, деп кабарлайт Жаратылыш министрлиги.

Маалыматка ылайык, Бүткүл дүйнөлүк жапайы жаратылыш күнүнө карата Кыргызстанда браконьерликке каршы күрөшкө салым кошкон жаратылыш коргоочуларды жана жарандык активисттерди сыйлоо аземи 12чи ирет өттү.

Иш-чараны КР Жаратылыш ресурстары, экология жана техникалык көзөмөл министрлигинин катышуусунда Кыргызстандагы “Ак илбирс” фонду уюштурду.

Демилге негизделгенден бери ак илбирске жана жапайы туяктууларга мыйзамсыз аңчылык кылууга жол бербегендиги үчүн 171 адам сыйлык алды. 2026-жылы Ардак грамоталар жана сыйлыктар 35 егерге жана 40 укук бузуунун бетин ачууда эрдик жана принципиалдуулук көрсөткөн жарандарга тапшырылды.

Егерлер алыскы тоолуу райондордо иштеп, аймактарды кайтарып, браконьерликке жана мыйзамсыз курал-жарак сатууга бөгөт коюунун алдын алууда. Алардын эмгеги сейрек кездешүүчү жаныбарларды, анын ичинде Кыргызстандын бийик тоолуу аймактарынын символу болгон ак илбирсти сактоодо негизги ролду ойнойт.

КР Жаратылыш ресурстары, экология жана техникалык көзөмөл министри А. Токтобаев биологиялык ар түрдүүлүктү коргоо жана айлана-чөйрөнү колдоо боюнча алдыңкы сапта тургандарды колдоо мамлекеттик экологиялык саясаттын артыкчылыктуу багыты болуп кала берерин белгиледи.

Салтанат эл аралык өнөктөштөрдүн —— Snow Leopard Trust, Woodland Park Zoo, Toronto Zoo, KCS Pacific Foundation, Whitley Fund for Nature жана Элдик Банктын колдоосу менен өткөрүлдү.

Сыйлык тапшыруу аземинде Кыргызстандын жаратылыш мурастарын сактоону күн сайын камсыз кылгандардын эмгеги бааланды.