Кыргызстандык катышуучулар "КАРДО" эл аралык сыйлыгынын жеңүүчүлөрүнүн катарына кошулду

"КАРДО" көчө маданияты жана спорту боюнча эл аралык сыйлык-конкурсунун Гранд-финалы Владивосток шаарында жыйынтыкталды. Россиянын 31 регионунан жана дүйнөнүн 28 өлкөсүнөн келген 135 катышуучу, анын ичинде Кыргызстандын өкүлдөрү IX сезондун жеңүүчүлөрүнө айланышты.

Гранд-финал 16-20-сентябрь күндөрү Дальневосточный федералдык университетинин стадионунда өттү. Ага 70ке жакын өлкөдөн 500дөн ашуун көчө маданияты жана спортунун өкүлдөрү катышты.

IX сезондун конкурстук программасына 85 миңден ашуун адам катталган. Тогуз сезондо долбоор 195 өлкөнүн 300 миңге жакын катышуучусун бириктирди.

Гранд-финалда Кыргызстанды "Хип-хоп" багытында чыккан Алтынай Исакунова тааныштырды.

"Мен хип-хопто өзүмдү көрсөтүү үчүн Кыргызстандан келдим, бул жерде жөн гана мелдешүүдөн да алда канча көп нерсе алдым. Аянтка чыкканда, жаныңда ар кайсы өлкөлөрдөн келген катышуучулар турганын билүү өзгөчө сезимдерди тартуулайт. Бул энергияны үйгө алып кеткиң келет жана өнүгүүнү уланткың келет", – деди ал.

Катышуучулар 13 дисциплинада ат салышты. Программада BMX, роллерблейдинг, самокат, скейтбординг, трикинг, воркаут, фриран, паркур, диджеинг, граффити, рэп, хип-хоп жана брейкинг камтылган.

Ошондой эле катышуучулар өздөрүнүн долбоорлорун сунушташты, билим берүү жана маданий программаларга катышышты.

IX сезондун жалпы байге фонду 7 миллион рублдан ашты. Жеңүүчүлөр акчалай сыйлыктарды, белектерди жана кесиптик өнүгүү үчүн мүмкүнчүлүктөрдү алышат.