Маданият министрлиги Сулайман-Тоого асма жол куруу сунушун колдобойт

Кыргызстандын Маданият, маалымат жана жаштар саясаты министрлиги Ош шаарындагы Сулайман-Тоого асма жол куруу сунушун колдобойт. Бул тууралуу министр Мирбек Мамбеталиев билдирди.

Анын айтымында, асма жол куруу идеясы Ош шаарынын мэринин жеке демилгеси болуп саналат. Мындай долбоорлорду кароодо улуттук мыйзамдар жана Кыргызстандын маданий мурастарды сактоо боюнча эл аралык милдеттенмелери эске алынышы керек.

«Ал терс жооп алат. Бизде улуттук мыйзамдар жана биз милдеттүү түрдө сактоого тийиш болгон эл аралык ченемдер бар», — деди Мамбеталиев.

Министр Сулайман-Тоо ыйык тоо экенин белгилеп, анын тарыхый көрүнүшүн сактоо зарылдыгын айтты.

«Сулайман-Тоого асма жол курууга таптакыр жол берилбейт», — деди ал.

Ошол эле учурда тарыхый-археологиялык комплекстин аймагында масштабдуу реконструкция жана реставрация иштерин жүргүзүү пландалууда. Долбоордун жалпы наркы болжол менен 12 млн долларды түзөт. Ал Дүйнөлүк банктын колдоосу менен ишке ашырылат.

Иштерди 2026-жылдын октябрь айында баштап, 2028-жылдын аягына чейин аяктоо пландалууда.

Мындан тышкары, Маданият министрлиги Сулайман-Тоонун буфердик аймагынын чектерин кайра карап чыгуу иштерин жүргүзүүдө. Кыргызстан аны оптималдаштыруу жана мүмкүн болгон кыскартуу маселеси боюнча материалдарды ЮНЕСКОго жөнөткөн. Сунушталып жаткан өзгөртүүлөр эл аралык эксперттер менен макулдашылышы керек.

Сулайман-Тоо өзгөчө маданий жана руханий баалуулукка ээ объект катары 2009-жылы ЮНЕСКОнун Дүйнөлүк мурастар тизмесине киргизилген.