Барпы театры 35-театралдык сезонун «Күттүргөн жаз да келер» драмасы менен ачат 

Барпы атындагы Жалал-Абад облустук кыргыз драма театры 35-театралдык сезонун ачат.

Маданият министрлигинен кабарлашкандай, жаңы сезон Кыргыз эл баатыры, драматург Бексултан Жакиевдин 90 жылдыгына арналат.

Сезондун ачылышынын алкагында көрүүчүлөргө үч спектакль тартууланат.

22-сентябрда саат 18:00дө Бексултан Жакиевдин «Күттүргөн жаз да келер» драмасы коюлат. Спектаклдин режиссёру — Кыргыз Республикасынын эл артисти Бакыт Жумалиев.

23-сентябрда саат 14:00дө Кыргыз Республикасынын эл жазуучусу Мар Байжиевдин «Он экинчи күн» комедиясы көрүүчүлөргө сунушталат. Режиссёру — Кыргыз Республикасынын эл артисти Бакыт Жумалиев.

25-сентябрда саат 18:00дө француз драматургу Жан Коктонун «Менин сүйгөнүм бар» психологиялык драмасы коюлат. Режиссёру — Акылбек Мамажан уулу.

Спектаклдер Барпы атындагы Жалал-Абад облустук кыргыз драма театрында өтөт.

Театрдын директору — Элдияр Келгенбаев, көркөм жетекчиси — Курманбек Ниязбеков.