Кыргызстан менен Япония маданият тармагындагы кызматташтыкты чыңдайт

Улуттук тарых музейинде Кыргызстандагы Япониянын элчиси Хирано Рюити менен жолугушуу болуп өттү. Бул тууралуу 15-сентябрда Маданият министрлигинен кабарлашты.

Жолугушууда Кыргыз Республикасынын Улуттук тарых музейинин директору Назгүл Өмүрзакова менен Япониянын дипломатиялык миссиясынын өкүлдөрү музей иши жана маданий-гуманитардык кызматташтыкты өнүктүрүүнүн келечеги тууралуу пикир алышты.

Жолугушууга Япония элчилигинин Экинчи катчысы Танимото Тацуя жана Үчүнчү катчысы Тоёда Хирото да катышты.

Тараптар тарыхый-маданий мурастарды сактоо, реставрациялоо жана коомчулукка кеңири жайылтуу багыттарында тажрыйба алмашуу, ошондой эле биргелешкен көргөзмөлөрдү жана маданий-гуманитардык долбоорлорду ишке ашыруу мүмкүнчүлүктөрүн талкуулашты.

Жолугушуунун соңунда эки өлкөнүн элдеринин достугун жана маданий байланыштарды чыңдоого болгон өз ара кызыгууну символдоштурган эстелик белектер менен салттуу алмашуу болуп өттү.